重點摘要
BMW傳聞正準備推出代號G74的全新硬派旗艦，目標直指豪華越野王座。
新車預計沿用下一代X5平台強化，外形會走方正粗獷路線，內裝亦會加入新世代豪華科技。
動力選項有望涵蓋輕混、插電混能甚至純電版本，M高性能版亦幾乎已被暗示存在。
外型要夠方正，脾氣要夠橫霸
雖然暫時未有原型車現身，但設計方向已經八九不離十：超高車身、硬朗直線條、巨型巨轆、粗獷黑色包圍，完全係一副「我唔係嚟買餸」的霸氣嘴臉。
新車叫乜名？總之絕不低調
官方暫時未公佈車名，內部代號則流傳為「G74」。按照BMW一貫套路，多數離不開「X」字頭；但呢個級數的猛將已經不再係普通型號，而係品牌門面、精神圖騰，係嗰種一停喺半島酒店門口就自帶BGM的霸氣存在。更有傳它可能會頂替XM的旗艦地位。即係話，BMW想要的絕不僅僅是一部越野工具，而是一部真正「會咬人」的招牌猛獸。#旗艦唔可以悶 #X定唔X #門面要夠惡
強化底盤：唔可以淨係識行商場
消息指新車會沿用下一代X5的平台再進行大陣仗強化。即係以現有CLAR架構為基礎，再瘋狂「補筋加骨」，練成一身鋼條身型。原因好簡單：真正越野並非去郊野公園打卡影相，而係要頂得住極端爛路、強大扭力同龐大車重輪流施暴。BMW一向係「公路快腳」專家，今次就要向世人證明，自己唔係只識得著皮鞋跑步。#平台要夠硬 #唔係得個樣 #泥地唔講情面
外觀造型：由斯文西裝友變身大隻保鑣
目前雖然只有外媒繪製的效果圖，但劇本其實唔難估。現時BMW旗下SUV大多數都係一副「城市精英臉」，呢部新旗艦就要徹底收起油頭粉面，改以硬派「方盒子」輪廓示人——直立車身線條、加厚越野輪胎，仲要將離地距大幅撐高。配合Neue Klasse新世代設計語言，確保它唔會老土到似軍用車，又唔會過份精緻似個玻璃花瓶。總之要夠粗獷，同時粗獷得極具品味。#方盒子先有霸氣 #保鑣身形 #粗獷都要靚
未來感車廂：野外求生同時享受極致奢華
車廂內部大概會緊隨Neue Klasse新世代佈局。巨型中控屏幕，配合一條緊貼擋風玻璃底部的全景顯示屏，設計簡潔得來又似足高級酒店大堂。後排方面，傳聞甚至可能會提供三排座椅，仲有機會加入「尾門觀景座椅」設計。即係話，無論你去Glamping、睇日落，定係等朋友遲到，都可以優雅地坐喺車尾打卡，扮到自己極識享受生活。說穿了，一切都係豪華感先行，野外生存技能只係附加戲碼。#豪華露營指定席 #第三排傳聞 #尾門位都有戲
動力配置：要電有電，要火有火
最合理的推測係：動力選項絕對唔會得一款，皆因BMW的現成武器庫已經相當鼎盛。XM嗰副4.4公升雙渦輪增壓V8插電混能引擎，本身就猛到似用拳頭劈開度門；X5 M的強悍V8亦隨時可以借將。廠方之前亦透露過，現有內燃機家族已經為未來嚴苛的排放法規做好準備。換言之，輕混能、插電混能，甚至純電版本通通都有機會列陣。呢個已經唔係買油定買電的信仰之爭，而係一份超級全餐：你要粗暴狂野？有；你要環保文明？有；甚至你想靜靜雞咁兇狠？一樣滿足到你。#V8仲未收皮 #電都可以惡 #動力自助餐
M Power高性能版？幾乎已經係明示
BMW M部門揸弗人 Frank van Meel 早前已經放過風，表示對推出「M版越野旗艦」持開放態度。翻譯做人話即係：只要呢個Project真係扑鎚落地，M版幾乎肯定走唔甩！既然廠方都決心殺入呢個級別，根本冇理由唔順手整多部癲喪版。如果將來真係有 M Power 版本，佢大概會係一部著住西裝出席半島晚宴，轉過頭又可以去爛地踢爆石路的極度暴徒。絕對稱得上係文明社會裡的野獸。#M部門忍唔住手 #性能怪獸待命 #斯文外表流氓骨子
幾時見真身？等得耐，但絕對值得期待
目前外界最普遍的講法，係預計2029年下半年先開始投入生產，意味著可能要等到2028年底至2029年初先會正式發佈現身。生產地極大機會落在美國 Spartanburg 廠房，亦即係 BMW SUV 的大本營。要等咁耐？係。不過，呢類顛覆性車型本來就唔係為咗趕交功課而生。它的終極任務，係要一炮過擊中品牌形象、豐厚利潤同全球話題性。若果成事，呢部「方盒版 BMW」絕對唔只係一個新型號咁簡單，而係代表住品牌性格一次極具張力的華麗轉身。#等得耐先夠大鑊 #Spartanburg出品 #寶馬性格大轉彎